Sektori i Mjekësisë Familiare

QKMF në Prishtine është Institucion Publik Parësor Shëndetësor, i cili si qëllim kryesor ka promovimin, ruajtjen dhe përmirësimin e shëndetit të popullatës përmes sigurimit të shërbimeve shëndetësore të  leverdishme, gjithëpërfshirëse dhe të vazhdueshme për banorët e komunës së Prishtinës.

Shërbimet shëndetësore janë te bazuara në konceptin e Mjekësisë Familjare, i cili ka synim që të gjithë banoreve t’u ofrojë shërbime shëndetësore gjithëpërfshirëse dhe efikase, të bazuar në të dhëna shkencore, përmes caktimit të mjekut familjar, i cili do të jetë portë hyrëse për të gjithë kërkuesit e shërbimeve shëndetësore dhe njëherësh pikë referuese për specialistët, konsultantët.

Këto shërbime janë te orientuara në:

• Promovim shëndetësor, parandalim, diagnostikim, mjekim dhe rehabilitim të sëmundjeve, çrregullimeve dhe lëndimeve;
• Kujdes parandalues nëpërmjet programeve të promovimit të shëndetit, vizitave shtëpiake dhe vizitave sistematike të fëmijëve;
• Ruajtje dhe përparim të shëndetit publik, përfshirë sero-profilaksen, vaksino-profilaksen,  promovimin  e  mënyrës së shëndetshme të jetës;
• Promovim të shëndetit oral dhe kujdes për shëndetin e dhëmbëve;
• Shërbime të kujdesit shëndetësor për nëna dhe fëmijë dhe shërbime të planifikimit familjar;
• Shërbime 24 orëshe.

Mjeku Familjar  kryen detyrën e bartësit dhe organizatorit te mbrojtjes parësore shëndetësore për popullatën e caktuar. Ai pranon pacientin nga infermierja, merre anamnezën, bën inspektimin, auskultimin, palpimin, vendos diagnozën e punës, referon për analiza dhe hulumtime diagnostike dhe konsulta specialistike, cakton diagnozën përfundimtare, trajton pacientin me terapi adekuate, bën edukimin dhe promovimin shëndetësor, këshillon pacientin, cakton terminin për vizitën e ardhshme dhe e plotëson kartelën shëndetësore.

Kompetencat e nevojshme të mjekut familjar janë:

1. Aktivitetet e mbrojtjes shëndetësore themelore

• Përdorimi i rregullt i kartelës shëndetësore në mënyrë të përshtatshme për një komunikim të mirë me pacientin dhe përcjellje të pacientit;
• Detektimi i hershëm i shtatzënisë, kujdesi antenatal, postnatal dhe planifikimi familjar;
• Përcjellja sistematike e të posalindurit;
• Menaxhim i fëmijës së sëmurë (përfshirë modelin e IMCI-së);
• Monitorimi i rritjes  dhe zhvillimit të fëmijëve sipas kritereve të OBSH-së;
• Kujdesi i posaçëm ndaj adoleshentëve – shërbimet shëndetësore mike për  adoleshentë;
• Kujdesi i posaçëm ndaj të moshuarve;
• Kujdesi sistematik ndaj pacientëve me sëmundje kronike jo ngjitëse;
• Kujdesi për emergjenca dhe lëndime minore;
• Shërbimi adekuat referues – nëpërmes funksionimit te mikrosistemeve klinike;
• Shërbimi i përcjelljes së pacientëve të lëshuar nga spitali;
• Vizitat shtëpiake dhe shërbimi paliativ;
• Shërbimi klinik i vizitave në zonat rurale.

2. Promovimi i shëndetit dhe parandalimi i sëmundjeve nëpërmes:

• Programit të vaksinimit  dhe edukimit  shëndetësor (shkollat, komunitetet);
• Programet e kontrollimit të sëmundjeve ngjitëse (vrojtimi epidemiologjik);
• Programet e kontrollimit të sëmundjeve kronike jo ngjitëse;
• Këshillimi higjienik dhe sanitar.