“RACE FOR THE CURE”- “VRAPO PËR SHËNDET”

Sot më 14 shtator, qytetarët e Prishtinës u bashkuan në aktivitetin madhështor “Race for the Cure – Vrapo për shëndet”, një kauzë globale e dedikuar rritjes së ndërgjegjësimit për kancerin e gjirit – një prej sfidave më të mëdha shëndetësore për gratë – si dhe mbështetjes së grave të prekura dhe të mbijetuara nga kjo sëmundje.

Aktiviteti u zhvillua në sheshin “Skënderbeu”, duke mbledhur një numër të madh pjesëmarrësish përfshirë Kryetarin e Prishtinës, z. Përparim Rama. Drejtorin e Shëndetësisë Dr. Izet Sadiku, anëtarë të kabinetit, menaxhmentin e QKMF-së, profesionistët e KPSH-së, partnerët nga AQH dhe qytetarë të shumtë të angazhuar.

Kanceri i gjirit është një nga sfidat më të mëdha shëndetësore për gratë në mbarë botën. Sot u bashkuam me të mbijetuarit e kancerit të gjirit dhe me pacientët që janë në trajtim, për t’i mbështetur në çdo hap të rrugëtimit të tyre, si dhe për të kujtuar me dashuri ata që fatkeqësisht nuk e fituan këtë betejë. Ne përcjellim një mesazh të fuqishëm: vetëm përmes rritjes së ndërgjegjësimit dhe zbulimit të hershëm mund të arrihet parandalimi dhe trajtimi i suksesshëm.

Ne ju inkurajojmë që të bëni kontrolle të rregullta dhe të mbështesni këtë kauzë jetike, “Në cdo hap ne mbështesim njëri tjetrin”, vetëm së bashku mund ta mposhtim kancerin e gjirit dhe të ndërtojmë një të ardhme më të shëndetshme e pa kancer gjiri.