JAVA E GJIDHËNIES

Me rastin e shënimit të Javës Botërore të Gjidhënies, profesionistët shëndetësorë të Kujdesit Parësor Shëndetësor në Komunën e Prishtinës kanë nisur sesione ligjëruese dhe edukative në të gjitha qendrat shëndetësore. Qëllimi i këtyre aktiviteteve është rritja e vetëdijes te nënat për rëndësinë jetike që ka gjidhënia për shëndetin dhe mirëqenien e foshnjës.

Për një fillim të mbarë në jetë ushqyerja vetëm me qumësht të gjirit gjatë gjashtë muajve të parë të jetës garanton një rritje dhe zhvillim të shëndetshëm për foshnjat.

Qumështi i gjirit është i sigurt, i pastër, dhe përmban antitrupa që mbrojnë foshnjën nga infeksionet, si dhe faktorë të rritjes që ndihmojnë zhvillimin e saj të plotë. Ai përmban të gjitha lëndët ushqyese të nevojshme për këtë fazë të hershme dhe të rëndësishme të jetës.

Për më tepër, nëpërmjet gjidhënies, nëna krijon një lidhje të ngushtë emocionale me foshnjën, duke i dhënë siguri, dashuri dhe përkujdesje të vazhdueshme.

Të mbështesim nënat, të promovojmë gjidhënien, të rrisim një brez të fortë dhe të shëndetshëm.