JAVA E DIABETIT NË KRYEQYTET

Me rastin e shënimit të Ditës Botërore të Diabetit dhe në kuadër të Javës së Diabetit, DSH e Kryeqytetit me profesionistët e KPSH-së kanë filluar organizimin e aktiviteteve me qëllim të rritjes së ndërgjegjësimit për diabetin për të promovuar rëndësin e parandalimit, kontrollit të rregullt dhe kujdesit të vazhdueshëm për këtë sëmundje kronike jo-ngjitëse. Diabeti është sëmundje që ndikon në rritjen e nivelit të sheqerit në gjak. Disa nga simptomet e para janë: etje e shtuar, lodhje ekstreme ose mungesë e energjisë, humbje e peshës, urinim i shpeshtë, shikim i turbullt, infeksione të shpeshta etj. Në sheshin “Zahir Pajaziti” në Kryeqytet filloi aktiviteti edukativo-shëndetësor \"Karavani Shëndetësor\" ku të pranishëm ishin nënkryetari i Komunës së Prishtinës Z. Alban Zogaj, drejtori i DSH-së Dr. Izet Sadiku, menaxhmenti i QKMF-së, profesionistë shëndetësor dhe pjesëmarrës të tjerë. Gjatë aktivitetit profesionistët e KPSH-së dhe vullnetarët e trajnuar i informuan dhe këshilluan një numri të madhë të qytetarëve për rëndësinë e kontrollave të rregullta të nivelit të sheqerit në gjak dhe për faktorët e rrezikut që ndikojnë në paraqitjen e kësaj sëmundje. Qytetarëve iu bë matja e glikemisë, tensionit arterial, parametrave vital, si dhe iu shpërndanë materiale edukativo-shëndetësore dhe aparata për matjen e sheqerit ne gjak(glikometër). Aktivitetet do të vazhdojnë me udhëtimin e Karavanit Shëndetësor në qendrën tregtare në Albi Mall, në Parkun e Gërmisë, të cilat do të organizohen në bashkëpunim me AQH-në. Nga sot, profesionistët e KPSH-së mjekët familjarë dhe infermierët familjarë , në ambientet e Qendrave të Kujdesit Parësor, kanë filluar me aktivitete dhe ligjerata edukativo-shëndetësore për pacientët dhe komunitetin për të rritur ndërgjegjësimin lidhur me parandalimin dhe trajtimin e diabetit. Gjithashtu ligjerata për pacientët me diabet do të mbahen ditëve në vijim në QKMF nga specialistët endokrinolog. Sot në Ditën Botërore të Diabetit të bashkohemi për një të ardhme më të shëndetshme ku përmes përvetësimit të stilit të shëndetshëm të jetesës, ushqimit të shëndetshëm, aktivitetit fizik të rregullt, peshës të mirëmbajtur trupore dhe mos përdorim të duhanit mund të parandalojmë paraqitjen e diabetit.