JAVA BOTËRORE E IMUNIZIMIT

Java Botërore e Imunizimit, e shënuar në javën e fundit të Prillit, është një ngjarje globale që synon të rrisë ndërgjegjësimin për rëndësinë e vaksinave dhe imunizimit, si dhe rolin e tyre në mbrojtjen e njerëzve të të gjitha moshave nga sëmundjet, të cilat mund të parandalohen me vaksina.

Sot, në Qendrat e Kujdesit Parësor Shëndetësor, u zhvilluan ligjerata për stafin shëndetësor lidhur me zbatimin e kalendarit të ri të vaksinimit të rregullt (2023/2024) në Kosovë, ku përfshihen tre vaksina të tjera:
Vaksina kundër Pneumokokut,
 Vaksina kundër Rotavirusit, dhe
Vaksina kundër Virusit të Papilomës Humane (HPV).  

Në Qendrën Kryesore të Mjekësisë Familjare dhe në 15 Qendrat e Mjekësisë Familjare të Kryeqytetit, si dhe në fshatrat e Komunës së Prishtinës, realizohet vaksinimi i rregullt sipas Programit të Zgjeruar të Imunizimit. Për më tepër, vaksinimi është falas!

 Vaksinimi është mënyra më e sigurtë dhe efektive për kontrollin dhe parandalimin e sëmundjeve serioze infektive, në një popullsi. Vaksinimi i rregullt dhe në kohë i siguron fëmijëve rritje dhe zhvillim të shëndoshë, si dhe siguron imunitetin kolektiv, sepse përmes vaksinave, ne mbrojmë jo vetëm veten tonë, por edhe njëri-tjetrin dhe gjeneratat e ardhshme.  

Shëndeti është mbi të gjitha dhe vaksinimi është pikërisht një shprehje e solidaritetit njerëzor duke kontribuar në shëndetin dhe mirëqenien e të gjithë shoqërisë.